၂၄၊ ဧပြီ၊ ၂၀၂၃

အက်ဖ်အေဖလား ဆီမီးဖိုင်နယ်မှာ ပင်နယ်တီအဆုံးအဖြတ်နဲ့ ကျော်ဖြတ်နိုင်ခဲ့ပြီးနောက် မန်ချက်စတာယူနိုက်တက်ဟာ တစ်ရာသီလုံး ပင်နယ်တီကန်တာကို လေ့ကျင့်နေခဲ့တာပါလို့ ဒီယိုဂို ဒါးလော့က ပြောဆိုခဲ့ပါတယ်။

၂၀၂၃ အတွင်း ကာရာဘောင်းဖလား ရခဲ့ပြီးသားဖြစ်တဲ့ သရဲနီတွေဟာ နောက်ထပ် အဓိက ဖိုင်နယ်တစ်ခုကို ထပ်မံရောက်ရှိခဲ့ပြီဖြစ်ပြီး ဒီတစ်ကြိမ်မှာတော့ မန်စီးတီးနဲ့ ရင်ဆိုင်ရမှာဖြစ်ပါတယ်။

ဝင်ဘာလေက ဆီမီးဖိုင်နဘ်အတွင်း ယူနိုက်တက်ဟာ ဘရိုက်တန်ကို မိနစ် ၁၂၀ ကြာ ထိန်းထားနိုင်ခဲ့ပြီးတော့ ဒေးဗစ်ဒီဂီယာကလဲ လက်စွမ်းပြကာကွယ်မှုတချို့ လုပ်ခဲ့သလို ပင်နယ်တီအဆုံးအဖြတ်ခံယူရာမှာ ၇ကြိမ်လုံးကို အောင်မြင်စွာ ကန်သွင်းနိုင်ခဲ့တာဖြစ်ပါတယ်။

ကာဆီမီရို၊ ဒါးလော့၊ ဆန်ချို၊ ရက်ရှ်ဖို့ဒ်၊ ဆာဘစ်ဇာနဲ့ ဗက်ဟော့စ်တို့အပြီး ဗစ်တာ လင်ဒီလော့ဖ်က နောက်ဆုံး အဆုံးအဖြတ် ပင်နယ်တီကို သွင်းယူခဲ့တာဖြစ်ပါတယ်။

ဘရိုက်တန်က ဆော်လီမက်ချ်တစ်ယောက်သာ လွဲချော်ခဲ့တာဖြစ်သလို ယူနိုက်တက်ဟာ ပင်နယ်တီအဆုံးအဖြတ်မှာ ဘာကြောင့် အမြဲတမ်း ယုံကြည်မှုရှိခဲ့တာလဲဆိုတဲ့အပေါ် ဒါးလော့က ဖြေကြားပေးခဲ့ပါတယ်။

“ရာသီကြို စပြီးကတည်းက ကျွန်တော်တို့ အသင်းသားအားလုံး ပင်နယ်တီကန်တာ လေ့ကျင့်ခဲ့ကြတယ်။ တစ်နေ့ကျရင် ဒီလိုအချိန် ရောက်လာမှာပဲဆိုတာ သိပြီးတော့ ကျွန်တော်တို့က အဆင်သင့် ပြင်ထားခဲ့တာပါ။ လူတိုင်းဟာ ဖိအားတွေအောက်မှာ သူတို့ရဲ့ အရည်အသွေးနဲ့ ရဲရင့်မှုကို ပြသခဲ့ပါတယ်။ ဘာလို့လဲဆိုတော့ အနောက်မှာ ဘရိုက်တန်ပရိသတ်တွေက မင်းကို အော်ဟစ်နေတဲ့ကြားထဲကနေ အာရုံစိုက်ဖို့ ကြိုးစားခဲ့ရတယ်။ လူတိုင်းက  ပင်နယ်တီကို အောင်အောင်မြင်မြင် ကန်သွင်းခဲ့ပြီး ဗိုလ်လုပွဲရောက်သွားတဲ့အတွက် တကယ်ပျော်ရပါတယ်”လို့ ဒါးလော့က ပြောဆိုခဲ့တာ ဖြစ်ပါတယ်။